زجل:
"لعطية"
العطية من عطية ربي
ما تعرف أش ليك مخبي
احسن النية وكون مربي
على طريق الرسول النبي
لا تعوم ف الدنيا بلا كواد
لبحر الهايج إيدي عوامو
لا تطلق لسانك كيف الواد
ربط فمك دير ليه لجامو
الخير لكثير مشا مع لجواد
واللي بغا الخير إحلي كلامو
الزمان دوار والسوايع بدالة
كل حالة فيها ما تشبه حالة
شد فالمعقول واترك لبسالة
لا تكون بحال سمسار الدلالة
الدنيا غدارة كيف البغلة الركالة
شحال من غني لبساتو الدربالة
ميزانها طالع نازل موضر الصروف
عبارها مرهون بحساب الضروف
فتيل الدوم ما بحال غزيل الصوف
والعارف نفسو ما يعرف الخوف
دير النية وامشي لطريق المعروف
صل واعبد ربك وارفع ليه لكفوف
بقلم.
محمد السوارتي الادريسي
ليست هناك تعليقات:
إرسال تعليق