الدبكة الفلسطينية :::
قال لي
أكتب قصيدة
قلت له
حط إيدك بإيدي
وخلي القلم والدفتر
عجنب
وحط شمالك عالكتف
وخلي يمينك عالجنب
وأبدأ معي الدبكة الفلسطينية
وأجل الدُحية البدوية
وأبدأ يا لّويح
لوح بالطاقية
مع نغمة دقات الطبلة
وأنغام الشباب والأرغول
وظل يا حادي قول و قول
عن الميجنا و العتابا
وارفع القدم في الهوا
وعد .. واحد .. اثنان.. ثلاثة
واضرب الأرض بقوة
ويصحصح اللي اخذته السهوة
وقول يا حادي.. وظلك قول
عن الميجنا و العتابا
و قول عن ظريف الطول
يا ظريف الطول وقف تقلك
رايح عالغربة وبلادك احسنلك
خايف يا ظريف تروح وتتملك
وتعاشر الغير وتنساني أنا
وقول يا حادي عن غزيّل بلادي
يا غزيل يا بو الهيبه
يا هاوي ومعذبا
شربة ميه من إديها
يا عيوني ما اطيبها
يا غزيل عالنهر
طُق وموت من القهر
فاضل لي عندك شهر
وبعدين مسافر بالمركبا
وخبر يا حادي عن الدلعونا
وقول : على دلعونا .. على دلعونا
راحوا الحبايب وما ودعونا
وعلى ألماني عالماني
قتلني وعاود راضاني
بظل بحبك يا اسمر
إن عشت وربي خلاني
وشعلل هالطبل يا طبال
ورقص الكتفين يا المزمار
وخلي الصبايا تنزل على الساحة
بالثوب المطرز.. وبالكوفية
مخنصره عالزنار
ويشبكن مع الشباب الكف بالكف
ويبدا الدوران واللف
وتشعلل الهيصة.. ويصدح
صفق الكف بالكف
وخلي الصبايا تقول
أنا الصبية الفلسطينية
ما بأنسى القدس
ولا القضية الفلسطينية
د. عز الدين حسين أبو صفية،،،
ليست هناك تعليقات:
إرسال تعليق