#من_ديوان_الحناوي ( تحية لأبطال أكتوبر ) يا صاحبي بتدور على إيه بدور على أبطالنا با بيه * أبطال حرب ولا سلام أبطال خطوا بنا لقدام في حرب اكتوبر ماتت ناس شهدا قلوبها زي الماس أحمد وسلامه وشبانه غردوا زي الطير في سمانا دي حرب عزة وحرب كرامه حرب محت ذل ومهانه قوم يا بطل ورينا وشك دا العدو ما قدرش يغشك شجاع وتاكل منهم عشره دي القوه ما هيش بالكتره عدوك سلم نفسه وفر وساب سلاحه خاف م الكر حرب اكتوبر فيها إعجاز والنصر دا اكبر إنجاز الجندي المصري بطل بجد لا يمنعه جبل ولا سد جولدا مائير فوجئت بالصدمه انهارت وحصل لها أزمه وجنودها ارتعشوا من الخوف أصل المصري بطل معروف عنده خبره وشهره كبيره ومدوق أعاديه الحيره يا قائدنا راجعين بالنصر افتحوا يلا ابواب القصر كله يهون لاجل خاطر مصر عايزين حفله تليق بالنصر إسرائيل عرفت دلوقتي إن المصري حليفه النصر جندي شجاع ما يخاف الموت وعدوه شبه الكتكوت إرفع راسك دوس عالصعب وخلى اخواتك جوه القلب انتا بطل من كوكب تاني قلتها كل الناس سامعاني حرب اكتوبر سايبه علامه في قلوبنا وقلوب ناس ياما سجل يا تاريخ قول للدنيا إن اكتوبر كان حاجه تانيه حرب ودامت ست ساعات بقرار سري من السادات خدعوا عدو كان غارقان في ملذاته يوم الغفران كان في عقيدته إن الحرب صعبه واحنا ضعاف القل لكن ثبت إن دا كان وهم وانهزموا من جيشنا الشهم ألف تحية وألف سلام مني لجيش مصر المقدام **** **** **** **** **** بقلم أ / عبد الرحمن فتحي الحناوي . من مصر . الأحد ٦ من أكتوبر سنة ٢٠١٩ . **************************