يل زندك رخي *********** يّل زندك رخي لاتعبر إلحادور -----أخاف عليك تغرﮔـ لو طفح روّجه ﮔـيل بالجرف لاتجزي حد إلڰيش - --------مو كامل قواك إو تڰدر إتفوّجه وذا رايد صحيح إتعاند إلخنياب --جربه إو ضوڰ طعم الشوغه والوّجه عله إحقول إلذره ينزل حمام إهواي --------وانواع إلطيور إلتغزي إمروّجه وعله إلريح إلتهب تتراڰص إلاغصان ---------سكته بلا نغم واللحان ممزوّجه ما شفنه بغل حطو إبحلڰه إللجام --------ولا خيال شفته إلصاعد إسروّجه ولا شفنه الأسد ضم راسه عن إلفيل -----ندري إلفيل صيده او عنده مدروّجه ولا شفنه إلصڰر صاير ضحيه البّوم ------ندري من الصڰور إلبوم مزعوّحه بمناطق نائيه تلڰاه إيعيش إلدب-- ---------أويفرح بالجبل لو غطته إثلوّجه إويبني إلعنكبوت إبيوت ڰد إلحال -------إوينصب للفريسه إخيوط منسوّجه مرات إلاغاني إتشدك إبلّحان ---------إو مرات إلتشدك ردحة إهزوّجه إو نفحات إلعطر تنرش رذاذ إعليك ---------وي جرة إلنفس إتحسهه مدموّجه إذا حڰها إلمعامل تطرد إلدخان ------------لو بيه منفعه ما نفخته البوّجه أنبهك علّ تمر إشكال بيه ونواع -------------مو نفس إلطعم وللذه منتوّجه إويفرق كل عثڰ عن عثڰ من تحويه --------مو نفس إلحلاوه إو نفس إللزوّجه غمك ما تميز بين ذيچ إوهاي ----------متعرف إلحمامه إوياهي فروّجه تتلون تجي كل ساعه لابس ثوب ---------- بس منك تجيني إلسالفه إلعوّجه إلطاسه إلشربك بيها ماي إسنين ------تشمرها عله صفحه إلڰيها مطعوّجه تريد إوياك إضحك والخلڰ زهڰان ----------يا سنّ إلضحكلك ساعة إلضوّجه عله إلشيّ إلبسيط إتعاند إوتغتاض ---------إو تتباهه كسبت إبهل زعل توّجه عليه إلبسته هاي إتعيدهه كلّ يوم --------نفس إلاسطوانه إو نفس هل موّجه ============= الشاعر علي السعدون