أمي أجمل كلمة محلية فمي شهد مݣطر عسل يتݣاطر وردة ف جنان الخاطر دالية مدلية بالمحبة الصافية روحها مسقية زينة السمية محال ف الكون فحالها يكون هزت همي باقي وْهَم وحتى ليوم مازالت لي هاز الهم تفكر في وتخمم عليها ألف هنية وهنية نبغي نتبرك منها كل صباح وعشية هي العمر هي الدنيا لمدفية بمحبتها ݣاشوشي لمزينة حياتي ☀️ شمس ليلي ونور ظلامي فرحتي تكمل مني نشوفها ݣدامي لالة العيالات الزين الصافي الدوا(ء) الشافي ياربي طول لها ف العمر راني على فراقها مانصبر هي عمارة الدار ديالت الكبار والصغار محبوبة ݣلبي و المدينة والدوار طويلة الرݣبة مولات لعيون الكبار تاعت النجمة والفجر الصايمة القايمة مولات الخمار حياتي بلا بيها قفار بدعاويها أنا محمي من عند الله محضي عندها مهدي مرضي ماكرهتش من عمري ليها نهدي ولكن مانبغينيش نكون اسباب حزنها والفقسة علي تقتلها ياربي ݣاد عمري مع عمرها ماتسبقني مانسبقها قدرني نوفي لها غير شوية من حقها هي جنتي وهي ناري هي الربح ؤراس المال حياتي من غيرها تذبال بقلم حسن الزايري أمي محبوبة ݣلبي