من ديوان جوّا بيتنا
الديوان القصيدة
.....................
لمّا قالوا اكتب قصيدة
قلت ح أكتب من عيوني
الحروف سبقت وركعت
ندهت الأفكار غيتوني
ألف فكرة وألف ذكرى
وألف من قال أذكروني
قلت ح أحكي عن حياتنا
واللي لما نعوزه غاتنا
واللي كان يحفر وقيعة
قصده يهدم جوّا ذاتنا
بس مين يقدر يفرّق؟
أو يفكر يوم يصدق؟
إن عصفورنا المزقزق
ينسى حضنه جوّا بيتنا
جوّا بيتنا.....
جوّا بيتنا كات عيلتنا
بين جموع الناس كبيرة
كنا بنّام ع الحصيرة
كنا نتغطى بأماني
لما نحلم بالصباح
والهنا يجمعنا تاني
ويا هالة م الكفاح
كنا حافظين الأغاني
لو لثومة وعبحليم
كلنا كان ... مستقيم
أي واحد كان يشوفني..
كان يقول لي ربنا يحفظ..
شبابك واللي نابك ...
تبقى دايما يابني محفوظ..
م العيون
والجفون لو جات تعاني ..
كات تفنجلها البطاطا
والبساطة بدون قلاطة
ف المحبة.
عمري ما ف يوم استخبى
حبة حبة الحب يكبر زي شابة
كان "حسن" ينده "سمية"
روحي فوق السطح هاتي..
شال أبوكي عشان دا خارج،
واوعي تنسي كمان عصايته..
السلّامية
أصله رايح ينشر الحب اللي سارح
بين كفوفه
ف اللي رايح واللي جاي
يجمع الفرح وحروفه
أي ضي .
لاجل مايوزع علينا وبالتساوي
أصله غاوي....
يزرع الفرح ف جناين ،،
واللي باين... إنه حي
لسه شايفه اليوم قصادي
جاي وناوي
يبدر الأفراح غناوي
يبقى أسطورة حكاوي
تبقى عايشة ماتنتهيش
رغم إن أبويا أمي
بس كان حاكم لجيش
كات حياتنا بجد حلوة
أي حاجة ماتتنسيش
والأمل كان أحلى غنوة
كان مرحرح زي عيش....
جه ساعتها الشيخ محمد،
قال لي سمّع .
قلت مش وقته ياسيدنا
قال لي سمع ،
واقرا ف القرآن ورتل ..
عاوز أدمّع
قلت ليه؟
قال لي صوتك ف القراءة ..
حلمت بيه
قول ياعبفتاح لإبنك يقرا سورة
وللا يمكن يبقى ناسي؟
قال له ناسي؟ !!!
تبقى ليلته ياشيخنا سودة
فوق دماغه ووقعة طين
لمّا ينسى كتاب إلهه
ح احبسه ف أوضة الخزين
ياخد العلقة اللي هيّ
والجيران راح يسمعوه
قمت أجري ....
فقال : هاتوووه
قال لي سمّع
قلت عاوز أقرا ايه؟
قال لي يوسف وللا مريم
وللا طه أو يس
قلت مين؟
قال لي لا وحياة أبوك
اوعى تدخل تاني قافية
أحسن الناس يسحبوك
تلقى نفسك ناقصة عافية
المهم.....
قعدت اقرا جوّا ع الدكة العجوزة
قال كلام وفهمت منه ....
إنه دايما كان له عوزة
إحفظ المولى وكتابه..
تبقى فايز
لأ وجايز
تبقى حد ياواد كبير
يعني ايه كلمة كبير؟
أبقى قدك؟
قال لي قدي؟
شوف ياافندي....
الكبير دايما بفعله ولكلامه الكل يسمع
والصُغـَيّر لو رجعله يمسح العين اللي تدمع
قلت ماشي.، ايه الجديد؟
قال لي تاني ح أعيد وأزيد؟
قلت منك نستفيد
قال لي صون أهلك وناسك
والرحم ، واصبر تنول
وإن بنيت ظبط أساسك
كله بالعقل وأصول
تلقى كل الخلق باسك
كان عدو أو كان عزول
ليست هناك تعليقات:
إرسال تعليق