Sans titre
زجل:
"احكام لقوال"
الجنة بناسها
والدنيا بهواسها
المراة بوناسها
والشجرة بغراسها
الدار بساسها
والذات براسها
إلى مشا الراس
آش تنفع الكسدة
ويلا اتخرب الساس
ما بقا ف الدار كعدة
ويلا ذبال لغراس
فقدات الشجرة الهدة
إلى هجر لمراة لوناس
ما قات عشرة مكادة
احسب وجمع لحساب
قبل ما يتسد الباب
أوتدفن ف التراب
وتواجه المكتاب
اللي زرعتيه تحصدو
واللي قدمتيه توجدو
ربك الحق مايظلم عبدو
سبحانو ف ملكو وحدو
يوم الحشر اتفضح لسرار
ويتكشف اللي خبناه فالدار
الدنيا الغرارة تصاحب الغدار
والاخرة تفرح بالناس لبرار
رد بالك لا تجرك لمصيدة
لمناشب ف الدنيا عديدة
اللي تبع هوا النفس لعنيدة
تصبح حياتو بالغم نكيدة
أجل لعمر مقدر محسوب
بأمر العالي علام الغيوب
نرجاوه يسترنا من لعيوب
واغفر لينا جميع الدنوب
وشافينا من جميع لضرار
بحق النبي النبي المختار
بقلم
محمد السوارتي الادريسي
ليست هناك تعليقات:
إرسال تعليق