...حوارية بيني وبينها وأخوها.. أنا يا مغربية يابنت الخير يا الساكيةg من داك البير دوري وجهك شوفي فيا... ..... هي سير سير عليا بعد راه يشوفك خويا احمد ويشبط فيك وفيا... ...... انا واش شريبة فيها نحير حتى قلبك باين كبير وخاطري ليك فرح ليا... .... هي لعندك أنا ما نقرب ولاانا نعطيك تشرب هاذ الشي ممنوع عليا.... ..... انا غير اروي ليا نار الجوف يبوح لك قلبي الملهوف و يخرج كلمة حقيقية... ..... هي أنا ما فيك نتيق ومن نعاسي ما ليك نفيق نوصيك سير بعد شوية.... .... انا جاني صوابك بالكرم ملفوف الزين عيني فيه تشوف وما حلى جمال شافتو عينية... .... هي سير را الناس فيك تشوف وأنا نحلف لك بحلوف تقدر تلحقك منهم أذية... ..... انا بغيت ميها نرش عروقي وبديك الحشمة ليا تروقي يا الغانسة عليها سبنية... ..... هي واش ما بغيتي تحشم عنداك دابا تندم وكلامك باين ما فيه مزية.... ..... انا الما منك ما يبقى شلوقي ومن لعطش يداوي حروقي سمعي لغايا ياذيك لبنية.... .... هي أخويا واش انت عطشان او حية ف سيفة انسان وناوي تضحك عليا.... ..... انا جيتك بالصدفة مجرور يا حمامة ما بين الطيور وشريبة منك تحلى ليا.... ..... هي ما عرفت اشنو نأخر من البير نظل نجر وهذا مكتاب عليا.... .... انا مدي ليا بوجهك مبشور ديك الكلةg منها حبك يفور وقربي نشدها بيديا... .... هي كلامك راه وسوسني وخاطري زاد محني واش ربي لي جابك ليا.... .... انا مديها ليا بصباع يديك ولحناني مرشومة في رجليك ونشوف فيك المشية.... .... هي راك قويتي لكلام وانا ما شي بنت لحرام واللعنة ما نخليها لواليديا... .... انا الجود راه ساكن فيك آختي والزين غالب عليك وعرفيني غ على ذيك السمية.... .... هي الى بغيتيني جينا للدار نعرف كلامك راه عبار والحالة دابا هي هي... .... انا غير بيني ليا تبسيمة وبردي خاطري بكليمة ونار الشوق شاعلة فيا... ..... هي عنداك تشعل بين كعابك وما نصيب ما فيك نفك وتولي زاندة فيك وفيا.... ..... انا انت سخية وكريمة يا اختي يا عمارت الخيمة راه كراجي gنشفوا عليا.... .... هي شد الكلةg هاك تشوف اشرب واروي داك الجوف والصهد منك راه وصل ليا.... ..... انا شكرا على هاذ البرود من البير يالله مجبود وشعيب ليا سمية... .... هي سميتي هي مريم وما ليا زهر باش نتعلم عايشة ف هاذ لعروبية.... .... انا سميتك راه عليها السر ومعاها طول لعمر والسكنى ديالك فين هي... ... هي انا ساكنة هذيك الدار قدامها كوري واشجار راها ورا ديك الكدية... .... أخوها آش تدير انت تما ؤ لا قاسك لعما أو لحمك حرقك شوية... .... انا أهلا أخويا أحمد شحال من عام عليك مبعد واش ما عقلتيش عليا... .... أخوها خليني غير نفكر ماشي ولد الحاج الطاهر صورتك ما عليا مخفية... .... انا شعيب أنا هو ما كاين ما نتخوا من السفر جيت عشية... .... اخوها ياك زهرة ليك ميمة وخالتك هي حليمة سنين هجرتوا لبادية... .... انا شوف سبحان الله ولد خال أمي ليا وراه وخا طوال الزمان عليا... ..... اخوها فين طولتي هاذ لغياب حتى نسيتي شحال حباب وغبرتي من هاذ الدنيا... .... أنا أييييه ياولد الخال سنين وانا جوال بين دول أوروبية... ... ........أحمد الناصري.....