بالله عليك يالشوافة ذوبي لدون كيف موالفة شاوري العقيسة الشارفة ها فتوحي بوحي بالسالفة تكرعي بوحي باللي عارفة أشنو مخبية أيامنا التالفة فكي حلامي لمخبلة الناشفة من دسم معاني لوقت الجافة لمعاني لعاكرة شارفة هارفة ورقة السوطة زهري تخمامي تقاضى مدادي جفت اقلامي كنت فلموسم مقدم سربة رامي وتاقي مجاور خوالي وعمامي حنحن عودي لدهم سمع كلامي حنحن ملي شم ريحة سلهامي بلا موسم فاتح بيبان خيامي شكارتي من رابوز مكرع بمالي مالي شكون القايد اللي بحالي في كافلة السودان تقدمت جمالي حرثي بكرية مازوزية في فداني تين وزيتون رمان مزين جناني كاسب ومعلف خرفاني وثيراني ياشوافة نهدي لك عودي بياض نهدي لك سرجو ونزيدك الزناد قراي كفي تهجاي شاوري لجواد عار ربي نطقي بالمخبي والمراد خيري في غيري اصبح بومزوي دفنو لي السم في دسم مطوي زرعو العداوة بين ضعيف وقوي قتلو فينا لخاوة بالكذوب لمروي دخلت عليك ياشوافة بربي دوي كري ياك عارفة سري يا شوافة مال كلمة لعرب صبحت مخالفة هدري خبرينا بلمكتوب يا عرافة مال قوة لغرب ترهب لينا خوافة جدودنا برزو العربية فوق عمارية وفي زمان الكوكل صبحت نكافة لبحور بمراكب الموت ولات قبور بعجاجها ومواجها لكافرة لجارفة زهقت رواح التفاح مشات فمزاح كثر نواح لبحر لاح كنايز مترادفة بلفقر عرضو صدر للضر بلا عسكر خلاو لوكر دوار ودشر كلشي تغر فين كصعة لميمة لبنينة يالمعنكر قطعت لبحر عندهم سرحوك لبكر الغرب بخيراتنا تقدم وبسلاح حكم الغرب بنى زاوية متحدة أشنو تم قول الله أعلم تبقى سالم لا تخمم الغرب خاوة ساوة لا حرب ولا دم وبين العرب عداوة ولا من يرحم فين الزاوية العربية توحد الكلمة ربيع لعرب اصبح خريف وظلمة بخرينا يا شوافة بشبة وفاسوخ الغرب سحرنا بالسلام المطبوخ زرعو فينا التاريخ لمزور لممسوخ فرطنا كرطنا فين وصية لشيوخ بخرينا يا شوافة طلقي الفاسوخ طلقي دخان الريحان يفيق لعقل يبني لهديم لقديم هذا هو الحل يا الشوافة أنت سياسة وكياسة الحراسة ولجواد عليك عساسة يالشوافة جوادك غرب دهلاسة باركة من لبياض لبستينا حلاسة أنت بسبع ثواب مغطية ولابسة تابعة جوادك وحنا في التعاسة يا شوافة يا سوطة كوني كوطة فين لكازوال ليه بال مليار بوطة بخيرنا وخميرنا وشعوبنا مزلوطة يا شوافة بعدي من جواد الغرب جوادك حصدونا وحطبونا حطب يالشوافة العرافة بان فيك لعجب فوري كصعة جمعي شعب وشعب نشركو طعام لقومية يجمعنا حب محمد المؤذن مؤسس ورئيس جمعية كازابلانكا للتراث الشعبي والتنمية والتربية على المواطنة