بدمعة من العين
حزينة و مكشوفة
و بغصة فالصدر
تتألم و مخفية..
ضربة الزمان
ولات باينة ومعروفة
ومغرفة عذابنا
بقصرية وحدة مسقية....
الخطوة من رجلينا
صبحت ذليلة معكوفة
و زهرنا علاش ذبال
وولات الميدونة مكفية....
زادت عولتنا
وصبحت معيوفة
لي كان غبار زريبة
ولى كيماوي و أدوية....
ردينا كسوتنا
قصيفة ومسروفة
تبعنا البراني
ولبسنا موضة رومية...
لحيا تقزدر
مولاه يحمر الشوفة
ولوقر تاه
خلانا قوم معمية...
السريفة على عناقنا
ولات مكروفة
وبالعرا فرطنا
فالسلهام والرزة والشكية g....
شحال من حولي بلا قرون
حسبوه خروفة
وحسانت الراس
ولات اشكالها دونية...
نظرة لغدر
ولات تجينا مخطوفة
من افعايل الشيطان
دايرة بينا لحمية...
دموع لبحوط
غ ساهلة مذروفة
مالها تجري ويدان
هايجة بقلة النية...
اولادنا أذاتهم
البلية الملفوفة
خلات لعقل غايب
والكسدة بوشامها مطلية...
ما خلات ليهم شوارب
ما خلات ليهم قنوفة
ولات ف صحتهم تهدم
غ شوية بشوية....
قطعوا شجرة لجداد
من جدرها مقطوفة
ما بقات فيها غلة
غ بين صباح و عشوية...
من عود القصبة
خططوا لينا لحروفة
ومال جيلنا اليوم
تكمم بالجهل والامية....
علاش زرعنا رومد
و رجع الحب جلوفة
ما درسنا فالرحبة مط
ولا بقات المطمورة محمية....
........أحمد الناصري.....
ليست هناك تعليقات:
إرسال تعليق