عكب بيا يا زماني
ؤرجعني دريري صغير
ما محمل مشاكيل
ما تشطنني هموم....
بايامي بحال فراشة
فوق النوار تطير
ويعجبني حالي
ؤانا ف كلتة نعوم....
ما نقرب، ديما هارب
من العافية والبير
مرة تلقاني ميمتي
فالتراب بحفرة مردوم....
لباسي آش من لباس
ويبان فعيني حرير
ونعالتي من الجلد
مخرزة غ بشرك الدوم....
ماضارب حساب لليوم
ولا غدا آش يصير
ولا عارف الدنيا
راها ما تدوم....
مرة كلخة نديرها عود،
شوية نردها سرير
قلبي ما عامر حسد
ولا ف خفا مسموم....
نلعب مع يدي و رجلي
ومعاهم شرير
شوية نجي عند لميمة
كلي مطلي حموم...
تلقاني بتعنيقة،
حيت ديما عليا تغير
وتنطق ليا مالك على حالتك
واش وليتي مجحوم.....
تغسل ليا حالتي
وتغطيني بحندير
وتعطيني ناكل
وخا من البزولة ما مفطوم....
يديني النعاس
وبيدي خبيز شعير
لا راس دايخ
ولا قلبي مكلوم....
آه يا ليام
آش معاك غادي ندير
اليوم الراس شاب
والفم ولى مهدوم....
........أحمد الناصري........
ليست هناك تعليقات:
إرسال تعليق