من حبي يا اخويا في الستات
ربي بلاني بخمسه بنات
"
‏القصة من أولها جميلة
‏وفي الآخر سووها طحينة
"
‏جات الأولى ‏وقلنا عطية
‏ومن ربي أرسلها هدية
"
‏سميناها من بحر الميم
وصرنا نناديها ياريم
"
وفي الاخر صارت مهفوفه
ودحين نقلها صطوفه
"
الثنوي جابتلنا هو
في الدور الثاني بالقوه
"
وتقلنا دا كفايه وبس
وبسرعه سوولي العرس
"
ودخلت بصعوبه الكليه
والواسطه كانت دوليه
"
وفي الاول دخلت جغرافيا
وسحبت منو بالعافيه
"
والاقتصاد بالعافيه داخلاه
وياخوفي تقول مبغاهـ
"
طلباتو ياسيدي كثير
تبغالو حسبه وتوفير
"
وتملي تكلمها نوال
ويدور ع الهاتف موآل
"
ولما تكلمها عواطف
يصبح في الجو عواصف
"
لكنها عاقله ومليانه
حنان بالجمله ورزانه
"
ولحقتها التانيه بسنتين
زمن النكبه في الحرمين

وقلنا كفايه نصك الباب
واخترنالها اسم رباب
كانت طفله ونكديه
ولاترحم وتقول فتحيه
هاجر كانت تخدمها
ومن ريحة باطها تصدعها
ولا كانت تاكل ولا تشرب
ومن حالها امها تتعب
سوينالها عمليه في الحلق
لما صار زي نفق الفلق
لكن في الواقع دمها شربات
واللي تسقط فوقوا تقول دا مات
اما التالته فكانت زربه
ما استخدمت الحرمه الحبه
وجاتنا في تمنية رمضان
وقاست امها اشكال والوان
قالوا نسميها وفاء
بس احسن لو قلنا رجاء
وكانت حلوه وكلبوظه
ولزيزه زي طبق البوظه
لكنها دحين طالت
وياخساره عقلها فالت
وتسوي سواة الاولاد
وكأنها من حارة اجياد
بس كانت في المدرسه تمتاز
بشطاره وتجيب ممتاز
يعطوها شهادة تقدير
تفرحبها وشويه تطير
والان صارت كسلانه
وانا خايف تطلع رسبانه
ماتعرف ايش نفع العلم
وتقول ياناس دا ظلم
وانا نفسي اسوق السياره
واقود في الجو الطياره
طبعها طبع الصبيان
وتتقلوز زي السعدان
اما الرابعه فكانت فاطمه
جاتنا في ليالي قاتمه
ياعيني سيدها صار وجعان
والكل فينا صار زعلان
وكنا نبغاها وليد
لكن ربي كان مايريد
لما قطعنا خمسه سنين
جاتنا بنت وقالوا يامسكين
ربي يسهل رب الكون
ويعينك دا رب حنون
وهادي الفاطمه عندها بووز
لما تمدو زي الكوز
حريفه في نكد العيله
لما ابوها يناوب ليله
والخامسه ياسلام ياسلام
حلوه زي بنت الاحلام
لكنها جاتنا قرعه
وقلنا نسميها بالقرعه
مريم قالوا نسميها
والرب من فوق يحميها
مريم دي سكر معقود
ومدلدله من اخر العنقود
لما تبغى من عندي حاجه
تفضل تنقر زي دجاجه