الشاعر والزجال: أحمد الكندودي
زجلية مغربية تحت عنوان:
***اللًهْطة***
اه،عليك يا لَهْطة ؤُ مَ درتي فِ لْقوم لمعمية
لِِِي عندو شوية رْيوقو سايلة ؤُ مَ كفيه
ؤلي عندو لَكْثير لقنعة غِ لغة وتسفيه
يخطف حقْ غيرو ب تَغْرير لكذوب ؤُلَحْمية
مالين لخيرغرقو ف لخطفة ورِبا وَتًبدير
بغاو يعيشو غ هما ،ؤيَتْحكمو ف صغير
وَخًا استعبدو الطيور الحرة ،م قْضاو مزية
بنادم ياكل م يْحسْ مَ يَشكر ؤم يشبع
فِ رزق غيرو يدو سْريفَة حية تخلع
جَرْداتو اللهفة من الإنسان والقيم الادمية
بل رَدًاتو وحش كذاب نصاب سمسار
وخا مزوق م يعرف حشومة ولا عار
لًهْطة بْلاتو فَتْحول شمشام ؤُعْل ريال حْدية
نفسو أمًارة ب سوء فشوف كِ رماتو
وْسخ الدنيا عماه وفي شرها جلاتو
دار فيها معلم وعايش فِ سًحْت ؤلمعصية
باع لمروة ولمحبة والصلة والصواب
صياد النعامة طماع شانو في تراب
هو ؤمالو ملهوط مْجوعِف ؤمَ يَسْوَى وْقية
صياد حق ضْعيف ؤلِ مَ يَكْسابْ ريال
حَقًار لَْفقير م يسوى بصلة بين الرجال
ؤمَ كرهش يسلب لَضْعيف حصيرو ولبطنية
نسا البرًاكة والنوالة والعشة والجار
حَمْقاتو اللهطة ، فطْغى، ؤصْبَحْ غذار
اللهطة حرماتو من العزة والقيمة والنية
ف سوق لكلاب لملهوط ولاً زْعيم
باعْ هْلو ،ؤخذع الميمة وَالْبُو لكريم
صفصاف خاوي ؤما فيه خير ولا حنيًة
اه عليك يالهطة ؤمدرتي في رعاوين
هادوك ل نساو الله ؤُباعو تْْراب وَدين
هادوك لخانو لبلاد ؤروهنوها بالعلانية
حرام عليك يا لهطة ؤم درتي حرام
عميتِ لبنادم لبصيرة ؤعجبو ظلام
ؤل ظنيناه ولد ناس، ردتيه قْطاطعي حْدية
اَه ،اه عليك يا لهطة...
ؤ م درتي ف لقوم لمعمية
***الشاعر والزجال:أحمد الكندودي ***المغرب***
ليست هناك تعليقات:
إرسال تعليق