الحرف المرشوم"زجل"

 يَـا حَرْفِـي جِينِـي رَانِـي بِـكْ مَغْــرُومْ

لاَ  تْخَلِّــي  صَاحَــبْ  لَقْلَــمْ  كَيْعَانِــي

طَاوَعْـنِـي، لاَ تَبْـقَـى مخـفـي مكتــومْ

كِـي الجَّـرَّة نْسِيـر اللَّـوَّك فِـي لْسَانِــي

لَاش تْجَافِـي وَ نْـتَا عَـنْـدِي مَـرْشُــومْ

 وَ الرَّشْمـة كِيف النَّغْمَـة عْلـى وْدَانِـي

رَا الْـقَـارِي ذَوَّاق الْـحَــرْف الْمَنْـظُــومْ

 ؤُ قْوَافِـي لَقْصَـايَـدْ وَاضْحَـة مْعَانِــي

يَـا  حَرْفِــي  تَيَّقْـنِـي  رَانِــي  مَلْهُــومْ

لَا  تْـكَابَــدْ  هَــمّ  لْـهَامِـي لاَ  جْـفَانِــي

يَا وْنِيـس لْوَحْدَة يَا مْوَاسِي المَهْمُـومْ

يـا مْفَــرَّقْ بَيْــن الْمَظلــوم وَ الْجَانِــي

مَـنْ گَالَّكْ يَا حَرْفِي حْسَاسَكْ مَعْـدُومْ

مَـنْ ذْيـك النَّغْمَـة لِّـي مْسَنْـدَة وْزَانِـي

يَـا حَرْفِـي جِينِـي رَانِـي بِـكْ مَغْــرُومْ

لاَ  تْخَلِّــي  صَاحَــبْ  لَقْلَــمْ  كَيْعَانِــي

بقلـم :عيسـى هبـولة