الصفصافه زمان تحت الصفصاف القلب يا ماشاف على شط النيل حب طاف كسرنا الحر بكباية خشاف من بردك يا نيل ماكنتش بخاف بتاع الحلابسه واقف ع الضفاف ولما جعنا أكلنا العيش حاف زمان تحت الصفصاف حتي لما الصيف طاف الغلابه تحت الصفصاف الشمس والحر عنهم عاف ناس والله محبين ألطاف بحب وود ناس أشراف هظار وضحك ومش عناف خلق الكل على جاره يخاف ولشرفهم صانوا ولعرضهم لا واحد جاب سيرته ولا شاف زمان تحت الصفصاف شوية دم كانوا خفاف بنات بلدي دول لطاف إللي لف كتير وشاف حن لبنات الأرياف لخفة الدم آه ولأنهم تقلانين ومش خفاف بنات بأخلاقهم نضاف يصونوا الشرف حتي لو أكلوا العيش حاف ولو ما فيش العيش ناموا بجوعهم خفاف أشراف لطاف نضاف زمان تحت الصفصاف طفل صغير ع الترعه خاف منطقة ومغطيها الصفصاف لا باينه مايه ولا حتى ضفاف بينهم عم محمد بيتغدي عيش حاف لا دعيش ودقه وطماطم وكام سريسه وشوية لبين من جوه غيطه طالع ومزهر ع الضفاف ياه كانوا شوية عيش نشاف عم محمد سماره من سمار طينه علشان كده الطفل منه خاف جرى عليه عم محمد وحضنه ووشه كله فرحه ونظرة ألطاف زمان تحت الصفصاف كان في ناس ظراف يلعبوا السيجه ويشدوا الحبل أبو الخطاف ويطلعوا النخل يجيبوا شوية بلح من نخلة عم حنا وياكلوهم عنده كام نخله بلحهم حلوين نضاف من غير غسيل بترابهم ويشربوا شوية مايا من إللي البلاص لا تقول ماية تلاجه ولا كولدير كانوا عايشنها وسايبينها علي الله وما كنتش سنينهم عجاف زمان تحت الصفصاف أشتغلت الساقيه وعم إسماعيل غني موال بأحتراف ليلى يا عيني وكامل الأوصاف حب رباني ومين زيه شاف وما كنتش الرجال أنصاف وطني منهم عليك أخاف من في الخيانه أحتراف ألطف بمصر يا صاحب الألطاف زمان تحت الصفصاف كلمات إندرو فرج عاشق نيلها 5/11/2017